የኆኀተ ሰማይ ቅድስት ድንግል ማርያም ቤተ ክርስቲያን አመሰራረት


የኆኀተ ሰማይ ቅድስት ድንግል ማርያም ቤተ ክርስቲያን አመሰራረት

ጊዜው ነሐሴ ፲፱፻፹፮ ዓም (August 1994 GC) ነው፡፡ በዚያን ጊዜ በቫንኮቨር የሚኖሩ ኢትዮጵያኖች ቁጥር በጣም አነስተኛ ሲሆን የኢኮኖሚ አቅማቸውም ከእጅ ወደ አፍ ነበር:: በዚህች ቤተ ክርስቲያን ምስረታ ላይ የታሳተፉ የመጀመሪያ የኮሚቴ አባላት አብዛኛዎቹ ከቶሮንቶና አካባቢው የመጡ ነበሩ:: ቤተክርስቲያኗ በመጀመሪያ የጸሎት ቦታ አድርጋ የተጠቀመችበት ስፍራ በቀድሞ አጠራር ዩጎዝላቪያ ተብላ ከምትጠራው ከሰርቭያን ኦርቶዶክስ ቤተክርስቲያን 505 E 63 Ave (Fraser & 63) የመሰብሰቢያ አዳራሽ ውስጥ ነበር:: በመጀመሪያ ማለትም ለአንድ አመት ያህል ለጸሎት የምንሰባስብበት እለትና ሰዓት እሁድ ከሰዓት በኋላ ከቀኑ 1:30 pm ስለነበረ ለብዙዎቻችን በጣም አስቸጋሪና ተፈታታኝ ነበር::የቤተክርስቲያኗን አዳራሽ መጠቀም የምንችለው እሁድ ብቻ ስለነበር፣ መዘምራን የሚለማመዱበት ስፍራ አጥተው፣ መጀመሪያ በግለሰብ ቤት በኋላም ቁጥራቸው ሲጨምር ከቫንኮቨር መሃል ከተማ አጠገብ ከሚገኘው Hasting & Keffir ተብሎ ከሚጠራው አካባቢ በእርዳታ በተገኘ ቤተክርስቲያን ውስጥ ይለማመዱ ነበር:: ይህ አካባቢ የአይምሮ ህመምተኞች፣ ሴትኛ አዳሪዎች በጠቅላላው ብዙ ህይወታቸው የተበላሸባቸው ሰዎች የሚገኙበት አካባቢ በመሆኑ፣ በማታ በዚያ አካባቢ መገኘት የሚያስፍራ ስፍራ ቢሆንም መዘምራኑ በየሳምንቱ እየተሰባሰቡ መዝሙር ተለማምደው ፈጣሪያቸውንና ምእመናንን ለማስደሰት የነበራቸው ጥረት ልዩ ስሜት የሚፈጥር ነበር:: በዚያን ጊዜ የቤተ ክርስቲያን መስራች ኮሚቴ አባል የነበሩትም ስለቤተክርስቲያኗ ጉዳይ ለመወያየት የሚሰበሰቡት በየኮሚቴው አባል ቤት እየተዘዋወሩ ነበር:: በጠቅላላው ብዙ ነገሮች ባልተሟላበት ሁኔታ እህታችን ማርታ በፍርዱ ምእምናኑን ለማሰባሰብ ባደረገችው ጥረትና በኮሚቴው፣ በመዘምራንና በምእመናን የነበረው ፍቅርና መተሳሰብ፣ ሊቀ ካህናት ምሳሌ እንግዳ ከቶሮንቶ በስልክ አባታዊ ድጋፍ እየሰጡንና አልፎ አልፎም ከኤድምንተንና ከካልጋሪ ወንድሞቻችን እየመጡ ወንጌል እያስተማሩን፣ የሌለው እንዳለ እየታሰበ ያለካህን በቴፕ ቅዳሴ እያስቀደስንና እርስ በእርሳችን መጽሐፍ ቅዱስ እየተማማርን፣ ወጣት መዘምራንም በመዝሙር እያመሰገኑ የቤተክርስቲያኗን ህልውና ይፈታተኑ የነበሩትንም መናፍቃን እየተጋፈጥን የሚያጸና አምላክ አጸናን::

በዚህ አይነት ሁኔታ ቆይተን፦ በረከታቸው ይደርብንና ተቀማጭነታቸው በአሜሪካን ሲያትል ከተማ የነበረው ብፁዕ አቡነ ዜና ማርቆስ የልጆቻቸውን ፍላጎት ለማሟላት፣ ምንም የቤተክርስቲያን ነዋያተ ቅድሳት ባልተሟላበትና እሳቸውን የሚያግዝ ካህን በሌለበት ሁኔታ በሚያዝያ ፲፱፻፹፯ (May 1995 GC) ቫንኮቨር ከተማ መጥተው ልጆቾቸውን መባረክ ብቻ ሳይሆን በመሰብሰቢያ አዳራሽ ውስጥ ከግለሰቦች ቤት በተውሶ በመጣ መጋረጃ በተጋረደ ጊዚያዊ መቅደስ ውስጥ ብቻቸውን ቀድሰው ልጆቻቸው አቆረቡ:: ክርስትና ሳይነሱ የቆዩ ህፃናትንም ክርስትና አነሱልን:: ቤተክርስቲያኗንም በእጣ የእመቤታችን የቅድስት ድንግል ማርያም እንድትሆን ተወስኖ “ ኆኅተ ሰማይ” (የሰማይ ደጅ) ብለው ሰየሙልን:: በዚያን እለት ይህን ክብር ለማየት የተሰበሰቡ ምእመናን የነበራቸው የደስታ ስሜት መግለጽ ያዳግታል:: አባታችን ብፁእ አቡነ ዜና ማርቆስ በቫንኮቨር ለሶስት ቀናት ቆይተው ከሄዱ በኋላም ለዚህች ቤተክርስቲያን ቋሚ ካህን ለማግኘት ከሚያደርጉት ጥረት በተጨማሪ ከተለያዩ አካባቢዎች እሳቸውን ሊጠይቁ የሚመጡትን ካህናት ይህችን ቤተክርስቲያንም እንዲያገለግሉ በማድረግ ረድተዋል:: እሳቸውም በተለያዩ ጊዜያቶች መጥተው ልጆቻቸውን አፅናንተዋል::

በእንደዚህ አይነት ሁኔታ በቴፕ ቅዳሴ እያስቀደስንና በተለያዩ ወንድሞቻችን የመጽሀፍ ቅዱስ ትምህርት እየተሰጠና ቤተክርስቲያኗ ባፈራቻቸው ወጣቶች የመዝሙር አገልግሎት እየተሰጠ የምዕናንም ቁጥር እየጨመረ ባለበት ጊዜ፣ ከሁለት ዓመት በላይ የቤተክርስቲያናቸውን አዳራሽ የለገሱን የሰርቪያ ኦርቶዶክስ አዳራሻቸውን እንድንለቅላቸው ጠየቁን። በጊዜው ከነበረን የገንዘብ አቅም ጋር ተስማምቶ ያገኘነው የኪራይ ቦታ Broadway ላይ የሚገኘው St. Michael Anglican Church ነበር:: ሆኖም ግን በዚህ ሥፍራ ቤተክርስቲያን ማደራጀቱን ለመቀጠል ቢሞከርም የቤተክርስቲያኗ የአገልግሎት ሰዓት ከሰዓት በኋላ ማለትም (12pm) ስለነበረ የምዕመናኑ ቁጥር መነመነ:: ከዛሬ ነገ ቪዛ አግኝተው ቤተክርስቲያኗን ያገለግሉናል ብለን ተስፋ ያደረግናቸው ካህናት በሙሉ ቪዛ በመከልከላቸው ምክንያት ካህን የማግኘት ተስፋችን ጨለመ:: በዚህም በምእመናን ይታይ የነበረው ተስፋ መቁረጥ ከ፲፱፻፺፯ ግማሽ ጀምሮ እስከ ፲፱፻፺፰ በመጠኑም ቤተክርስቲያኗ ለፈተናየተጋለጠችበት ጊዜ የነበረ ቢሆንም፣ በእግዚአብሔር ቸርነት በ፲፱፻፺፰ መግቢያ ላይ ለመጀመሪያ ጊዜ እሁድ ሙሉ ቀን እንደልባችን የምንገለገልበት የተሟላ ቤተክርስቲያን በ290 East 61 Ave አገኘን:: ከመሰረቷ ጀምሮ የተጠራቀሙ ነዋየ ቅድስትም ከግለሰብ ቤት ወደ ቤተክርስቲያን በየሳምንቱ ማመላለሱ ወንበር መደርደሩ ምንጣፍ ማንጠፉ መጋረጃ መስቀሉ አበቃ:: በፈለግነው ጊዜ ከፍተን የምንገባበት ቤተክርስቲያን እግዚአብሔር ሰጠን::

የቅድስት ማርያም ጽላት አመጣጥ

ለቤተክርስቲያኗ ካህን ለማግኘት ብዙ ውጣ ውረድ አሳልፈናል፣ በ፲፱፻፺፯ እና በ፲፱፻፺፰ ከቶሮንቶ፣ ከስዊድን እንዲሁም በግሪክ በኩል ልናመጣቸው ያሰብናቸው ካህናቶች በተለያየ ምክንያት ተደናቅፎብን፣ በተለይም በግሪክ ሀገር ተማሪ የነበሩትን አባት ለማምጣት ከዓመት በላይ ጊዜ ካጠፋን በኋላ ቪዛ ተሰጣቷቸው ከዛሬ ነገ ይመጣሉ ብለን ስንጠብቅ እሳቸው ግን ወደ አሜሪካ ሄዱ:: የመነኩሴው አሜሪካን መሄድ ያሳዘነው ኮሚቴ የተፈጠረውን ችግር ለምዕመናን እንዴት እንደሚገልፅ በጭንቀት ላይ እያለ መነኩሴው አሜሪካን መግባታቸውን ባሳወቁን አሥራ አምስት ቀናት ሳይቆጠር፣ ከስዊድን እንዲመጡልን ጠይቀን ከዓመት በላይ ምንም መልስ በማጣታችን ተስፋ ቆርጠን የተውነው በረከታቸው ይደርብንና የቆሞስ አባ ወልደ መስቀል ደምሴ ቪዛ መሳካቱን አባታችን እራሳቸው ደውለው አሳወቁን:: እሳቸውም ቪዛ በተሰጣቸው ወር ባልሞላ ጊዜ ውስጥ በግንቦት ፲፪ ቀን ፲፱፻፺ (May 1998 GC) ከስዊድን ወደ ቫንኮቨር መጡ:: እሳቸው ሲመጡ ያልጠበቅነው ትልቁን የቤተክርስቲያን ፀጋ “ፅላት” ይዘውልን መጡ:: በግንቦት ፳፱ ቀን ፲፱፻፺ (June 6 1998 GC) የጰራቅሊጦስ በዓል ዋዜማ ብፁዕ አቡነ ዜና ማርቆስ ከሲያትል መጥተው ቆሞስ አባ ወልደ መስቀል ያመጡልንን ፅላት ባርከው አስገቡልን:: ከዚያን ጊዜ ጀምሮ ቤተክርስቲያናችን በፅላት ይቀደስባት፣ ሙሉ የቤተክርስቲያን አገልግሎት ይሰጥባት ጀመር::

አባታችን ቆሞስ አባ ወልደ መስቀል ደምሴ ከመጡበት ጊዜ ጀምሮ ምዕመናኑን ለማሰባሰብ የነበራቸው ጥረት ከፍተኛ ከመሆኑም ባሻገር ባጭር ጊዜ ውስጥ ቤተክርስቲያናችን የራሷን ቦታ ገዝታ ቅዱስ መስቀሉን በጉላላቱ ላይ ለማየት ምዕመናኑ ሲያስተባብሩና መኖሪያ ቤታቸውንም በዱቄት እስኪጨናነቅ ድረስ ዱቄት በመሸጥ የተለያዩ ዘዴዎችን እየተጠቀሙ ገቢ ለማሰባሰብ ይጥሩ ነበር:: መጀመሪያ እንደመጡ ብቻቸውን ቢቀድሱም ከጥቂት ሳምንታት በኋላ ግን፣ ልጆቻቸውን ለመጎብኘት ከኢትዮጵያ የመጡ የልጅ ልጅ ያዩ አባት በዚያን ጊዜ አቶ መንገሻ ኃይለስላሴ በኋላ ቀሲስ መንገሻ በቅዳሴና በሌሎችም የቤተክርስቲያ ተግባራት እየረዷቸው ቤተክርስቲያኗ በአጭር ጊዜ ውስጥ ከፍተኛ እድገት አሳየች::

በ፲፱፻፺፩ ዓም (1999 GC) መጀመሪያ አካባቢ ለአንድ ዓመት ያህል የተጠቀምንበትን ቤተ ክርስቲያን ለቀን፣ ለብዙ ምዕመናን ለትራንስፖርት አመቺ የሆነ ከ500 ምዕመናን በላይ ማስተናገድ የሚችል የተለቀቀ ቤተ ክርስቲያን አግኝተን የቤተክርስቲያናችን አድራሻ Burnaby ውስጥ Patterson Sky Train Station አጠገብ 3895 Kingsway ከሚገኘው ቤተ ክርስቲያን ውስጥ ሆነ:: ይህ ቦታ በፊት ከነበርንባቸው ቦታዎች ሁሉ ሙሉ ነፃነት ነበረው:: ቤተክርስቲያኑ ሰፊ የምግብ አዳራሽ ስለነበረው ከቤተክርስቲያን አገልግሎት በኋላ መጠቀም ከመቻላችን ሌላ በወር $400 እየከፈልን ሳምንቱን ሙሉ እንደ ልባቸን እንገለገል ነበር:: በእንደዚህ ያለ ሁኔታ ቤተክርስቲያናችን እያደገች ሳለ በሐምሌ ፲፱፻፺፱ 1999 ዓም አባታችን ቆሞስ አባ ወልደ መስቀል በጊዜው በደረሰባቸው ህመምና ከበሽታው ጋር ተያይዞ በመጣው የህክምና ወጪ ካናዳን ለቀው ወደ ስዊድን ለመመለስ እንደተገደዱ ለምዕመናን ገልፀው ያመጡልንን ፅላት ግን በቀሲስ መንገሻ አደራ ጠባቂነት አበርክተውልን በሃዘን ተለዩን:: ቀሲስ መንገሻ በዚያን ጊዜ በልጅነት እድሜ ከተሰጣቸው የዲያቆንነት ስልጣን ሌላ ገና ቄስ አልነበሩምና ቆሞስ አባ ወልደ መስቀል በመሯቸው መሰረት ዘወትር እሁድ ጥዋት በፀሎት እየመሩና ቤተክርስቲያኗ ያፈራቻቸው ምዕመናን የመጽሐፍ ቅዱስ ትምህርት እየሰጡ መዘምራንም በተጠናከረ ሁኔታ የመዝሙር አገልግሎታቸውን እየሰጡን ለአንድ ዓመት ከቆየን በኋላ ግንቦት ፲፱፻፺፪ (May 2000) ብፁዕ አቡነ ይስሃቅ በወቅቱ የሰሜን አሜሪካና የካረቢያን ሊቀ ጳጳስ ቫንኮቨር መጥተው ፅላት ያለቄስ በመቀመ አዝነው፣ ቀሲስ መንገሻን ባይቀድሱም ፅላቱን ይጠብቁ ዘንድ አግባብተው የቅስና መዓረግ ሰጧቸው:: በቁርባን ተጋብተውና ህገ እግዚአብሔርን ጠብቀው የኖሩት አቶ ይባሉ የነበሩት አዛውንት፣ በቅድስት ኆኅተ ሰማይ ቤተክርስቲያናችን ዲያቆንነት አደሱ፡የቅስናንም መዓረግ አገኙ:: ለእግዚአብሔር የሚሳነው የለምና ስልጣነ ቅስናን በተቀበሉ ሁለት ወር ባልሞላ ጊዜ ውስጥ ሁሉንም አጥንተውት ከነሐሴ ፩ ጀምሮ የፍልሰታን ጾም ሙሉውን ፲፮ ቀናት ብቻቸውን ቀድሰው አቆረቡ:: ከዚያን ጊዜ ጀምሮ የተቋረጠው የቅዳሴ አገልግሎት ቀጠለ:: ወደ ሃገራቸው ኢትዮጵያ እስከተመለሱበትም ጊዜ ድረስ አንድም ቀን አገልግሎት ሳይጓደል ቤተክርስቲያኗን በሁሉም ረገድ አገለገሏት::

በ2001 እ.አ.አ መጨረሻ በዚያን ጊዜ በነበሩ የሰበካ መንፈሳዊ ጉባኤ አባላት ጥረትና በሊቀ ካህናት ምሳሌ እንግዳ እርዳታ ከኢትዮጵያ ቆሞስ አባ ገብረ ኪዳን መጡልን:: ቀሲስ መንገሻ ኢትዮጵያ ከሄዱ በኋላ አልፎ አልፎ አባ ወልደ ስላሴ (አቡነ ሉቃስ) ከሲያትል እየተመላለሱ የቅዳሴ አገልግሎት ቢሰጡንም አልፎ አልፎ ያለካህን ጸልየን የምንመለስበት ጊዜ ነበርና ካህን ለማግኘት በጓጓንበት ጊዜ ቆሞስ አባ ገብረኪዳን በመምጣታቸው ተደሰትን:: እሳቸውም ለዓመት ያህል ጊዜ ለብቻቸው ሲቀድሱ ከቆዩ በኋላ በእሳቸው አሳሳቢነትና የሰበካ መንፈሳዊ ጉባኤና በሊቀ ካህናት ምሳሌ እንግዳ ተባባሪነት ዲያቆን ኃይለ ልዑል አካሉ (የዛሬው ሊቀ ስዩማን ቀሲስ ኃይለ ልዑል) ከኢትዮጵያ መጥተው የቤተክርስቲያኗ አገልግሎት ተጠናከረ:: በመስከረም ፲፱፻፺፭ ዓም (September 2002) ዓመታዊ በዓሏ መስከረም 10 የሚውለውን የጼዴንያ በዓል ብፁእ አቡነ ዜና ማርቆስ፤ ብፁእ አቡነ መልከጸዴቅ፣ ሊቀ ካህናት ምሳሌ እንግዳና ከሌሎች ማለትም ከቪክቶሪያ፣ ከሲያትል፣ ከኤድምንተን ከካልጋሪ ከመጡ ካህናት እና ምዕመናን ጋር ትልቁ ቤተክርስቲያን በምዕመናን ተጨናንቆ በጣም በሚያስደስት ሁኔታ ቤተክርስቲያናችን የመጀመሪያ ዓመታዊ በዓል አከበረች:: በ2003 እ.አ.አ ከአራት ዓመት በላይ ስንገለገልበት የነበረው ቤተክርስቲያን ሊሸጥ ካልሆነም ፈርሶ ሊታደስ መሆኑን ተነገሮን ከቻልን እንድንገዛ ካልሆነ ግን ቦታ እንድንፈልግ ተነገረን:: በዚያን ጊዜ የመግዛት አቅማችን በጣም ደካማ ቢሆንም በእህታችን ምሥራቅ በዛብህ አነሳሽነት እያንዳንዱ በነፍስ ወከፍ $1000 እንዲያዋጣ በፈቃደኝነት ተወስኖ ገንዘብ ማሰባሰቡ ተጀመረ:: ለመክፈል አቅም ያልነበራቸው እንኳን ከcredit card እየተበደሩ ለቤተክርስቲያን ቦታ መግዣ ሰጡ:: በዚህ መሃል ለቤተክርስቲያናችን በተቻለው ሁሉ ይረዳን የነበረው የቤተክርስቲያኑ ባለቤት ቦታ እስከምንገዛ ወይም የኪራይ ቦታ እስክናገኝ ከቤተክርስቲያኑ አጠገብ የነበረውን የቤተክርስቲያኑን መዝናኛ አዳራሽ በጊዜያዊነት ለመጠቀም ፈቅዶልን፣ ብዙ ችግሮች ቢኖሩም እንዳልነበሩ እያሰብን አዳራሹን በየሳምንቱ ወንበር በመደርደርና ምንጣፍ በማንጠፍ ሥዕሎቻችንን በመስቀል የቤተክርስቲያኗ አገልግሎት ሲቀጥል፥ በሌላ በኩል ለቤተክርስቲያኗ ቦታ ለመግዛት በቫንኮቨር በሰሪ በኒዌስትና በበርናቢ ብዙ ቦታዎችን አየን:: እስከ ሚሊዮን ዶላርም ድረስ ለመግዛት ተዋውለን ነበር ሆኖም ግን ቦታ ለመግዛት በምንሯሯጥበት ጊዜ ከአንድንድ አባላት በተጠየቀውና በጊዜው በነበረው መንፈሳዊ ኮሚቴ ዘንድም የቤተርስቲያኗ ምዝገባ በኦንታርዮ መሆኑ ቀርቶ በBC ቢሆን የቤተክርስቲያኗ ባለቤት እዚህ ያለው የቫንኮቨር ምዕመናን መሆኑን ያረጋግጣል ብሎ በማሰብ፣ የመጀመሪያውን የቤተክርስቲያናችን የህግ ሰርተፍኬት በማውጣት የረዱንን ሊቀ ካህናት ምሳሌን በማሳወቅ በታህሣሥ ወር ፲፱፻፺፰ (December 2005) ቤተክርስቲያናችን “ኆኅተ ሰማይ ቅድስት ማርያም የኢትዮጵያ ኦርቶዶክስ ተዋህዶ ቤተክርስቲያን በቫንኮቨር ካናዳ” ስም በቢሲ ተመዘገበች::

በ2006 እ.አ.አ መጨረሻ አካባቢ በቆሞስ አባ ገብረ ኪዳንና በሰበካ መንፈሳዊ ጉባኤ መሃል አለመግባባት ተፈጥሮ፤ ይህ አለመግባባት በምዕመናኑም ዘንድ ተዛምቶ ቤተክርስቲያኗ ችግር ላይ በመውደቋ እና አስታራቂ ኮሚቴ ተቋቁሞም ሊያስታርቅ ከማይችልበት ደረጃ ላይ በመድረሱ ሰበካ መንፈሳዊ ጉባኤ ካህኑን ከቤተክርስቲያኗ አገልግሎት እንዲያሰናት ምእመናን በፊርማ በጠየቁት መሠረት November 2006 እ.አ.አ ቆሞስ አባ ገብረ ኪዳን ከቤተክርስቲያን አገልግሎት ተሰናበቱ:: ይህም በምዕመናኑ ዘንድ ልዩነት ፈጥሮ ቤተክርሲቲያኗ ተከሰሰች:: ምንም እንኳን ችግሩ የተነሳው በቆሞስ አባ ገብረኪዳን ከቤተ ክርስቲያን አገልግሎት መታገድ ቢሆንም፡ ክሱ ግን አቅጣጫው ተለውጦ በፖለቲካ ችግር ውስጥ ተዘፈቀ:: በዚህም ቤተክርስቲያኗ ለሁለት ተከፈለች:: ለቤተክርስቲያን መግዣ የተሰበሰበው ገንዘብ ከ150ሺ በላይ ለጠበቃ ተዳረገ:: ከከሳሾችም ወገን ከዚያ በላይ ወጪ ሆነ:: በዚህ መሃል በፍቅር እግዚአብሔርን ስናመልክ የነበርን ምዕመናን ለሁለት ተከፈልን:: በቀላሉ ያልቃል ተብሎ የተገመተው ክስ በDecember 1, 2006 እ.አ.አ ተጀምሮ ብዙ ውጣ ውረድ ታልፎ በOctober 9, 2009 በተከሳሾቹ በኆኅተ ሰማይ ቅድስት ማርያም ቤተ ክርስቲያን አሸናፊነት ተጠናቀቀ::

በቆሞስ አባ ገብረኪዳን ከአገልግሎት መታገድ በኋላ ቢችሉ ሊያስታርቁ ካልሆነም ካህን እስከ ሚገኝ ሊረዱን ቆሞስ አባ ወልደ መስቀል በDecember 2006 እ.አ.አ ከስዊድን ወደ ቫንኮቨር መጡ:: የእሳቸው አመጣጥ በቅጡ ያልገባቸው ተቃዋሚዎች የማይገባ ነገር ቢፈጽሙባቸውም እሳቸው ግን ሁሉንም በትዕግስት አልፈው የተረበሸውን ምዕመናን እያፅናኑ ክሱ እስከ ተፈፀመበት ጊዜ ድረስ ቤተክርስቲያኗን ሲያገለግሉ በኋላም በ2008 እ.አ.አ ስራውን የተረከበው የሰበከ መንፈሳዊ ኮሚቴ በጠየቃቸው መሠረት፣ በህመም ምክንያት ወደ ሃገራቸው ሄደው ህይወታቸው እስካለፈችበት ጊዜ ጥቅምት ፲፪ ቀን ፳፻፬ (October 2011 GC) እግዚአብሔር በሰጣቸው አቅም ሁሉ ለቤተክርስቲያኗ ደክመዋል::

ቅድስት ቤተክርስቲያናቸን ከተመሰረተች ጊዜ ጀምሮ በብፁእ አቡነ ይስሐቅ ይመራ ከነበረው ሀገረ ስብከት መመሪያ በመቀበል በሳቸው የካናዳ ተወካይ ሊቀ ካህናት ምሳሌ አማካኝነት ቤተክርስቲያናችን ብዙ ካህናትን እየተቀበለች ብታስናግድም፣ በ፲፱፻፺፪ ዓም (2000 GC) በሰሜን አሜሪካ በተመሠረተው የውጭ ሲኖዶስ ችግር ውስጥ ቤተክርስቲያናችን እንዳትዘፈቅ በማሰብ ቤተክርስቲያናችን ገለልተኛ እንደሆነች በቤተክርስቲያናችን የውስጥ ደንብ በግልጽ ተደንግጎ አገልግሎቷን ቀጠለች:: ይህም ሆኖ ግን ቤተክርስቲያናችን በሰሜን አሜሪካ በፓትሪያርክ ብፁዕ ወቅዱስ አቡነ መርቆሪዎስ መሪነት ያሉትንም ሆነ ከሀገራችን ኢትዮጵያ የሚመጡትን አባቶች መንፈሳዊ አገልግሎትና ቡራኬ ክሱ እሰከ ተጀመረበት Decemeber 1, 2006 GC ስትቀበል ቆይታ፣ ከክሱ ተከትሎ በመጣው ችግር ምክንያት ግን ቤተክርስቲያኗ በሰሜን አሜሪካ ሲኖዶስ ሥር ካሉ ካህናት ጋር ያላት ግንኙነት እንዲቋረጥ ሆኗል:: ቤተክርስቲያኗ በገለልተኛነት መቆየቷ የቤተክርስቲያን ሥርዓት እንዳልሆነ በአባታችን ቆሞስ አባ ወልደ መስቀል በተሰጠው አባታዊ መመሪያ መሠረትም፣ ቤተክርስቲያናችን በኢትዮጵያ በሚገኘው ቅዱስ ሲኖዶስ ስር ሆና ሃይማኖታዊ መመሪያ እንድትቀበል ከ፳፻፪ ዓም (2010 GC) ጀምሮ በኢትዮጵያ ኦርቶዶክስ ተዋህዶ ቤተ ክርስቲያን በካናዳ ሃገር ስብከት ስር ሆና ሀዋርያዊ ተልዕኮን እየፈፀመች ትገኛለች:: በዚህም መሰረት የካናዳ ሃገር ስብከት ሊቀ ጳጳስን ብፁዕ አቡነ ማቲያስ ከቶሮንቶ እየመጡ ቤተ ክርስቲያናችን ቢያንስ በዓመት አንድ ጊዜ አባታዊ መመሪያና ቡራኬ ትቀበላለች::

እግዚአብሔር ምስጋና ይግባውና ቆሞስ አባ ወልደ መስቀል ገና በህይወት እያሉ ዲያቆናት የነበሩት የቅስና መዓረግ አግኝተው ነበርና የቤተክርስቲያናችን አገልግሎት በተሟላ ሁኔታ ቀጥሏል:: እግዚአብሔር የራሳችን ቦታ እስከሚሰጠን በ304 8th street, New west Minster በዩክሬን ኦርቶዶክስ ቤተክርስቲያን ውስጥ የቤተክርስቲያናችን አገልግሎት በተሟላ ሁኔታ ይሰጣል:: ቦታ ለመግዛት ጥረቱም በከፈትኛ ሁኔታ ቀጥሏል:: ቸርነቱ የሰፋ አምላክ በቅርብ ጊዜ የራሳችን ቦታ ይሰጠናል;: በተለያዩ ምክንያቶች የራቁ ወገኖቻችንንም ያቀርብልናል ብለን እናምናለን::

ወስብሃት ለእግዚአብሔር ወለወላዲቱ ድንግል ወለመስቀሉ ክቡር; አሜን::